歐國盃：歐國盃冠軍撐荷蘭德國

猪拉多纳

4年一度嘅歐國盃打到嚟，今屆賽事競爭空前激烈，歷來9支拎過冠軍嘅名牌球隊悉數出賽，要預測冠軍的確有難度。不過普遍最被睇好嘅5大勁旅之中，西班牙、英格蘭同葡萄牙都受到「歐盃魔咒」困擾，反而荷蘭（5.5倍）同德國（4倍）實力強勁兼士氣高昂，絕對係「冠軍」嘅抵買選擇。
冇球隊成功衞冕歐國盃

足智彩開出嘅歐國盃「冠軍」賠率，衞冕嘅西班牙無可否認係頂頭大熱（3.3倍），不過唔好唔信邪，歐國盃歷來從未有球隊可以成功衞冕，強如柏天尼嘅法國、「三劍俠」嘅荷蘭、3度奪冠嘅德國（連西德）都未試過「冧莊」，西班牙決賽周前又有韋拿、佩奧爾2大主力受傷缺陣，「衞冕魔咒」真係不可忽視。
德荷被視為西班牙勁敵

除咗西班牙，英格蘭（12倍）亦受到「歐聯魔咒」纏擾，原來過去52年來，只得一屆係由當年歐聯冠軍球隊所屬國家捧歐國盃，唯一例外嘅係88年荷蘭喺燕豪芬歐聯封王後掄元！類似嘅「金靴魔咒」亦可能玩殘葡萄牙，因為過去歐國盃年入波最多嘅歐洲球員，所屬國家隊只得一次捧到盃，呢鋪葡軍好有可能畀C朗「累」死！

足智彩5大熱門中有3隊「賴嘢」，德國同荷蘭就獨善其身。事實上，荷蘭今屆人才鼎盛，尹佩斯、亨特拉爾、洛賓、史奈達組成嘅進攻線火力十足，早被視為西班牙最大對手。

至於新星湧現嘅德國，原來佢哋過去6次打入歐國盃決賽，成績係梅花間竹咁贏、輸、贏、輸、贏、輸，如果今屆再入決賽，睇怕都係「贏」面高，貼「冠軍」，一定不離荷蘭同日耳曼軍團！

冠軍推介：德國（4倍）、荷蘭（5.5倍）
３大魔咒逐屆睇

年份 歐國盃冠軍 歐聯冠軍 歐洲金靴

2012 ??? 車路士（英格蘭） C朗拿度（葡萄牙）

2008 西班牙 曼聯（英格蘭） C朗拿度（葡萄牙）

2004 希臘 波圖（葡萄牙） 亨利（法國）

2000 法國 皇家馬德里（西班牙） 菲臘斯（英格蘭）

1996 德國 祖雲達斯（意大利） 安迪拉迪斯（格魯吉亞）

1992 丹麥 巴塞隆拿（西班牙） 麥哥斯（蘇格蘭）

1988 荷蘭 燕豪芬*（荷蘭） 高拉克（土耳其）

1984 法國 利物浦（英格蘭） 魯殊（威爾斯）

1980 西德 諾定咸森林（英格蘭） 雲丹貝治（比利時）

1976 捷克 拜仁慕尼黑（德國） 卡爾法斯（塞浦路斯）

1972 西德 阿積士（荷蘭） 梅拿*（西德）

1968 意大利 曼聯（英格蘭） 尤西比奧（葡萄牙）

1964 西班牙 國際米蘭（意大利） ---

1960 蘇聯 皇家馬德里（西班牙） ---

註： *為破咒球員/球隊