狂牛撞殘虎 錫身冇攻細

猪拉多纳

被譽為歐國盃爭標大熱嘅西班牙，今晚會喺瑞士首都伯爾尼同南韓拍跳。原本「鬥牛兵」係想藉呢場波練破密集防守，但佢哋近排勁多傷兵，預計今仗會踢得比較錫身，對住缺少進攻靈魂嘅「殘陣太極虎」，朱楓覺得2.02倍入球細值得捧場！（now630及632台周四凌晨2:00直播）
西班牙多傷兵唔敢搏

西班牙近排認真黑仔，繼佩奧爾受傷後，右閘伊拉奧拿亦受傷退隊，到咗西班牙盃決賽後，再有中場法比加斯拉傷右腳大腿肌肉證實要抖10日。為備戰歐國盃，西班牙近日去咗瑞士集訓，仲同塞爾維亞踢咗場熱身賽，結果輕勝2:0。

「鬥牛軍」嚟緊會踢多兩場熱身賽，分別係今晚對南韓同下月3號主場對中國，對手唔強睇落似乎想練多啲點破密集防守。不過隨住領隊迪保斯基公布咗最後23人大軍，加上陣中唔少傷兵，朱楓相信迪帥今場會叫班球員避得就避唔好再傷。加上巴塞同畢爾包班國腳仲未歸隊，鋒力大減，難怪西班牙近日集訓時，有球迷係咁叫迪保斯基選番魯爾入伍啦！
南韓練兵派副選

因為早前喺世盃外圍賽差啲出局，南韓上年12月改由崔康熙執教，呢位前全北汽車教練一上任後，「太極虎」即喺熱身賽贏烏茲別克4:2，再喺第3圈關鍵戰主場贏科威特2:0，錄得2連勝兼出線第4圈。

不過今次硬撼西班牙，崔康熙放棄左閘朴原載同中場金相植等多位近2場均擔正嘅球員，兼放棄埋因服兵役問題被球迷插爆嘅王牌前鋒朴主永，似乎想練兵居多。賽前新特蘭前鋒池東沅話，有信心頂朴主永個位，但佢畢竟只得20歲，經驗有限，另一射手李東國就成33歲老得滯，呢對一老一嫩組合唔似威脅到西班牙大門，預計都係死守居多，博輸少啲同人講句雖敗猶榮就算啦！
橫數千軍

西班牙半場慣食白果

‧近8場6勝1和1負，對上4戰半場有3場食白果。

‧近4次交手不敗，獲2勝2和，連續3場半場開0:0。

南韓半場少失波

‧近8場5勝2和1負，有6場半場保持不失。

‧世界排名31，比排第1嘅西班牙低30位。