歐國盃：當全能足球變成穩守突擊

猪拉多纳

「901」戰術係我細個睇94世盃決賽周，美國對巴西時發揮嘅死守戰術。當然，阿美利堅國民當年可能連咩叫越位都唔識，正如我完全睇唔明職欖同冰球一樣。係，唔夠班死守無可厚非，但如果今屆歐國盃得番西班牙肯攻，對唔住，我唔識欣賞，更加唔希望荷蘭走上呢條路。
荷蘭棄攻捧盃都冇用

或者你會話我，唔識欣賞防守藝術，覺得我嘅指摘過時兼無謂，但當我諗起，兩年前荷蘭喺世盃決賽對西班牙，竟然要拋棄最引以為傲嘅進攻足球玩穩守突擊，又真係好心噏。當你擁有洛賓、尹佩斯、雲達華治同史奈達，對住咁高咁大嘅西班牙，竟然要好似甲組仔喺足總盃遇到曼聯咁、想偷雞博和互射12碼，咁其他球隊撞到西班牙，又應該點踢至啱？

英格蘭同法國冇荷蘭嘅進攻足球傳統，相信球迷唔會覺得打突擊有問題，但當巴西都放棄（或被迫放棄）森巴足球，全世界得番西班牙高舉進攻旗幟，如果荷蘭今屆以穩守突擊重奪歐國盃，球迷係咪應該開心？如果巴塞有朝一日要用「901」鬥皇馬，粉絲又會點睇？防守的確可以贏冠軍，但如果可以放手一博駁火踢好波，捧盃應該更得人心。