富明尼斯反噬小保加

猪拉多纳

歐聯曲終人散，大家難免會有啲失落，但唔緊要，仲有「南美歐聯」自由盃，明早有兩場八強次回合，頭場巴西富明尼斯主場迎戰阿根廷小保加。富明尼斯首回合輸○比一，主因係大部分時間踢少一人，最終僅小負一球，結果唔算太差，Mic少有信心富軍可憑地利優勢收復失地，主隊讓平半，力撐上盤。

（有線61及201台周四早上6時30分直播）
首回合以寡敵眾唔順氣

富明尼斯實力不亞於小保加，但首回合出師不利，踢到33分鐘已經有後衞卡連奴斯被逐，結果下半場失守輸波。眾所周知，巴西同阿根廷足球一向勢不兩立，有陰謀論指首回合球證受到對手主場壓力，導致富軍寡不敵眾，富明尼斯返到自己地頭，報仇心態更深，而且「球證天秤」今次亦好可能傾番向佢哋。

事實上，富明尼斯主場威力強大，近五次主場出擊全勝，要贏對手一球，機會仍然相當高。另一邊廂，阿甲爭標進入衝刺階段，榜首小保加僅得一分領先優勢，存在後顧之憂，未必保得住首回合勝果。
哥連泰斯鬥華斯高追細

另一場自由盃八強次回合上演巴西內戰，哥連泰斯主場對華斯高，雙方首回合打和○比○，哥連泰斯近期死晒火，近四仗三仗冇波入，而華斯高畢竟作客，應會採取穩守突擊，預料入波唔會多，要入球細。（周四早上9時開賽）