歐國盃：俄羅斯耆英未開戰先嚇癲

猪拉多纳

Katie今日會為大家分析下歐國盃A組第2支球隊─俄羅斯。好多人都話「戰熊帝國」同波蘭好近，覺得俄羅斯有半個主場之利，但Katie之前去波蘭旅行識咗個朋友，佢同我講原來波蘭人勁憎俄羅斯，計劃嚟緊歐國盃期間，喺俄羅斯進駐嘅酒店門外示威，等俄羅斯班球員冇覺好瞓，試問點會有作為？

俄羅斯邊境同烏克蘭接壤，烏克蘭就黐住波蘭，所以俄羅斯今屆歐國盃分組賽所有賽事喺波蘭舉行，驟眼睇好似好有着數。俄羅斯已喺波蘭揀咗一間極之Elegant嘅酒店入住，不過Katie之前去波蘭旅行識咗位朋友，佢同我講原來波蘭人好憎俄羅斯，原因係覺得波蘭總統萊赫‧卡欽斯基喺2010年4月10號死於空難，唔係官方所講因為天氣差造成，而係俄羅斯喺背後精心安排，以報復萊赫‧卡欽斯基之前公開鬧過俄羅斯。
傳政治暗殺惹公憤

自從嗰次意外後，每逢每個月10號，至少有2,000人會去萊赫‧卡欽斯基生前所住嘅王宮悼念，咁啱得咁蹺，呢間王宮就正正喺俄羅斯所入住酒店隔籬，最慘俄羅斯只係Book咗間酒店一半房，即係唔可以向公眾關閉。消息指好多波蘭人已準備喺6月10號以悼念為藉口，喺俄羅斯所住酒店門外喊口號抗議，甚至向班俄羅斯球員擲雞蛋洩憤，你話班俄羅斯球員唔驚就假。
華斯利比里蘇斯基退隊

領隊艾禾卡特早前揚言俄羅斯喺今屆歐國盃將會係爭標奇兵，不過前名將尤蘭立即走出嚟話佢廢噏，仲鬧俄羅斯今屆班球員實在太老，全隊只得5個球員細過25歲，相反有8位球員大過30歲，35歲嘅後衞沙朗洛夫更自04年後再次重返國家隊。

尤蘭仲話艾禾卡特已落實歐國盃後執教燕豪芬，個心根本一早飛咗返鄉下，完全無動力為俄羅斯制訂戰略性計劃。最慘係俄羅斯前日開操，一直受臀部傷患困擾嘅守將華斯利比里蘇斯基，喺嘗試慢跑後感到痛楚，無奈宣布退隊，不過佢嘅孖生兄弟阿歷斯比里蘇斯基則會繼續留低。