新衫印定英超章似升硬

猪拉多纳

今晚歐洲球壇有兩個極重要嘅決賽上演，除咗有萬眾期待嘅歐聯終極戰外，打頭陣仲有全球最值錢嘅英冠升班附加賽決賽，今季降班嘅韋斯咸同黑池會師溫布萊球場，為咗近9,000萬鎊（約11億港元）嘅升班收益上演大廝殺，1.85倍韋斯咸W係投X首選。（now638台及廣東體育周六晚10:00直播）

過往英冠升班附加賽都以銳氣行先，實力反而次要，聯賽排第5嘅黑池近期氣勢無疑唔錯，已經9場未輸過，好彩季軍韋斯咸季尾亦及時回勇，近6戰贏咗5場，既然大家氣勢接近，當然係撐排名高兩位嘅「錘仔幫」啦！
近2次對碰皆入4球

韋斯咸喺1月掃入射手美爾納特及華斯迪，早就為重返英超鋪路，若非喺3月頻頻失分，理應直接取得升班資格。喺近期流出嘅新季波衫照，更被發現率先印上英超章，根本就當正自己升硬班，即使如今要淪落踢升班附加賽，仍然係近10季最高分嘅英冠季軍，今仗更有喺上圈首回合梅開二度嘅哥利臣及時復出，戰力毋庸置疑。

黑池喺季尾雖係威係勢，但睇番季內兩次對賽，先係10月作客吞4蛋，2月返回主場再輸1:4，點樣都係捧韋斯咸穩陣。話晒今場都係大戰，菠菜選擇都唔少，有1.85倍齋W，1.67倍讓平半盤，連1.45倍晉級盤都有，不過睇番近9屆附加賽決賽，居然都未試過加時，所以不妨直取較好分嘅1.85倍客W。

足球重心：韋斯咸（勝）、拜仁慕尼黑（上盤）

馬膽推介：10場(1)摩法神采

上季贏馬一役早就顯示級數，只係今季初遠征澳洲先至影響進度，休息過後到季尾終於復甦，畢竟季內仲未交代，大摩勢必諗盡辦法搏盡。
英冠升班附加賽賽制

決賽安排於中立場溫布萊舉行，如果雙方於法定時間打成平手，就要加時30分鐘，再和即互射12碼定生死。