車仔鬥攻先有機會

猪拉多纳

緊張、精彩、多元化嘅歐聯決賽今晚打到嚟，今屆賽事再次顯示足球世界冇嘢係冇可能。初時以為巴塞、皇馬起碼有一隊可以入決賽，最終出人意表，決賽竟然冇西甲球隊。不過，足球引人入勝，正因為不時爆冷，賽果難以預測。

講番今場大戰，車仔有四位主將停賽，兩位中堅加利卡希爾同大衞雷斯亦有傷在身。今屆決賽喺拜仁主場舉行，車路士集多個不利因素於一身，如果要實現大逆轉捧盃，唔可以再靠死守，而要背水一戰，排雙箭頭同拜仁搏槌。
魔獸獨闖龍潭冇着數

一般「正路睇法」認為車仔應該用「魔獸」杜奧巴打單箭頭，採取穩守突擊對付強大嘅拜仁。無錯呢位射手喺對巴塞時，憑個人天生勇悍體力，令對手難以招架，但今次對同樣硬朗嘅德國兵團未必有着數，所以需要有拍檔幫助。費蘭度托利斯狀態已回勇，兩人雙劍合璧有望入波。

另外，車仔後場人腳捉襟見肘，即使想堅守城門，亦未必可以達到預期效果。而且唔好忘記拜仁亦有兩位防線正選阿拉巴同畢斯杜巴停賽，只要車仔願意豁出去一搏，或會有驚喜收穫。