超班山度士受讓有鬼撐沙士菲

猪拉多纳

南美自由盃嚟到8強首回合，聽朝就有兩場阿甲同巴甲球會火併，其中實力未算突出嘅沙士菲（圖左），主場遇上新科聖保羅州聯賽錦標冠軍山度士，竟然照樣讓波，主W熱到得1.95倍。力奇一向鍾意捉鬼盤，山度士近8場贏7場都冇人睇好，擺明有蠱惑，今場一於撐主W啦！（有線61及201、廣東體育周五早上9:00直播）

有「新比利」尼馬壓陣嘅山度士，近期氣勢勁爆，周一佢哋喺主場4:2贏完古蘭尼之後，兩回合計以7:2贏出聖保羅州聯賽錦標，翻查歷史，佢哋係近43年來首支可以造出3連霸佳績隊伍，近4場州聯賽都梅開二度嘅尼馬，仲以20個入波成為賽事神射手，認真巴閉。
近8場7勝莊家唔睇好？

山度士陣容星光熠熠，尼馬、甘素都係天才新星，中場仲有經驗老到嘅艾蘭奴頂住，最緊要係佢哋近排喺自由盃同州聯賽夾埋8場贏咗7場，氣勢咁勁，但個客W竟然冷到有3.3倍，莊家似乎係完全唔信山度士贏得囉！

另邊廂嘅沙士菲，近7戰只得2勝3和2負，狀態唔算太突出。上輪喺阿甲悶和小保加，對手仲要係超過半場打少個人，沙士菲咁都贏唔到，都咪話唔得人驚。更恐怖係，沙士菲主場原來已經連續7場贏唔出，聽朝咁都要讓波？不過，力奇真係唔信莊家會死錯人，今場一於捉心理撐主勝啦！
自由盃賽制：

採主客兩回合淘汰制，今輪為8強首回合，若總比數相同，作客入球較多一隊晉級，再和則於次回合後隨即互射12碼決勝。