陳志釗第二個林瘋?

猪拉多纳

隨着NBA球隊紐約人刮起「林瘋」效應後，好多外國體育球隊都想尋找自己的「林書豪」，上屆巴甲盟主哥連泰斯之前從中國借用陳志釗，又睇吓呢位會穿上「Zizao」名字波衫的前公民國援，能否在巴西球壇掀起另一波「陳瘋熱」？巴甲聯賽嚟緊周日清晨開咧，相信大家唔使幾耐就會搵到答案。
搞噱頭開拓華人市場

一支巴甲老牌勁旅，與一名曾來港甲踢過公民的無名之輩，可謂風馬牛不相及，但彼此能連繫一起，從陳志釗加盟時的舞獅盛況，不難看出哥連泰斯對他的重視。的確，由媒體吹噓他為巴西名將阿祖安奴的競爭對手，到放棄穿上「200」號波衫，總算能製造一定的話題，令華人社會藉住呢位華藉前鋒多留意巴甲，哥連泰斯算係成功。

哥連泰斯向來是巴甲中最識搞噱頭的球會，由從前連簽兩位「死敵」阿根廷球員泰維斯同馬斯真蘭奴，到引入過氣名將朗拿度同卡路士，曾掀起巴甲一股老兵回巢熱，甚至去年想回購泰維斯，均成功收到宣傳效果。今次借個中國球員返來，你話唔係為商業搞噱頭，搵鬼信咩？不過如果齋坐冇得踢，呢種宣傳效應只係捱得一時，畢竟中國球員留洋經歷大多數都係高開低走，何況陳志釗去到巴西冇耐，在訓練時搞到左肩脫臼，可能要養傷4個月，咁點做「陳瘋」呀？
哥連泰斯衞冕路難行

不過，哥連泰斯同「肥祖」阿祖安奴解約，只靠老將列特臣支撐住。法林明高仲有「細哨」朗拿甸奴同路夫雙箭齊發，甘美奧召回經驗豐富的薛羅拔圖，上屆自由盃冠軍山度士保留尼馬、甘素、艾蘭奴等大牌，實力強橫。面對各路精兵來勢洶洶，看來哥連泰斯的衞冕之路將異常難行。

猪拉多纳