卡城博大霧

猪拉多纳

07/05/2012
文： 麥馬拿仁

都落後到兩球，入唔到波就拜拜，卡迪夫城肯定發癲進攻！英冠升班附加賽準決賽次回合，韋斯咸主場鬥卡迪夫城，捧大！卡城首回合喺自己地頭輸○比二，領隊馬基麥基死唔認輸，話只要今仗趁早入番粒仲有價講，肯定全民喪攻；韋斯咸質高擅反擊，唔怕冇波入。翻查對上四次同階段比賽全開大，今場續追！（now 638周一晚11時30分直播）


韋斯咸去到附加賽大打真軍，上仗作客完全唔赦對手，打出今季代表作，憑哥利臣梅開二度輕鬆贏波，如路蘭同卡頓高爾把握力較佳唔只贏咁少。其實卡城開賽早段亦連番錯失入波機會，睇番韋斯咸本季主場取分比作客少，近七次主場只有一場冇失波，今仗卡城落多幾錢肉緊，可破「錘仔幫」大門。馬基麥基賽前大出口術，話韋斯咸領先兩粒好易鬆懈，只要卡城可以喺開賽早段入波，就有翻身機會，預示卡城肯定採取主動，大打開放式足球。

近兩季生死戰全「大」

韋斯咸領隊艾拿戴斯由保頓時代開始已打穩守突擊，卡頓高爾、華斯迪等都擁有高速度，今仗卡城空群而出，合晒「錘仔幫」何仄，隨時靠快速突擊「揼死」對手。其實去到淘汰制賽事次回合，落後一方拒絕坐以待斃，開大比率自然高。對上兩季升班附加賽準決賽次回合，四場全數開大，以卡城及韋軍攻力，大盤開出機會極高。