撐皇馬「客勝」封王

猪拉多纳

02/05/2012
文： 力奇

皇馬今晚只要作客畢爾包全取3分，就可以唔使理早場巴塞對馬拉加嘅戰果，相隔4年重奪西甲冠軍。更重要嘅係，首席球星C朗仲要爭做歐洲金靴射手肯定唔留手，撞正要留力爭西班牙盃同歐霸盃嘅畢爾包，皇馬唔難大捷封王。皇馬奪標瘋狂夜同2.25倍「讓球客勝」，你點可以錯過！（now632台及廣東體育周四凌晨4：00直播）


皇馬目前喺西甲積分榜領先巴塞7分，剩番最後3輪，如果今晚早場巴塞輸波，銀河艦隊已經即時奪標，不過力奇認為呢個機會唔大，皇馬想提早捧盃，睇怕都係靠自己最實際。


事實上，正力爭球會史上第32個聯賽冠軍嘅佢哋，主帥莫連奴領軍爭標經驗豐富，點會喺呢個關鍵時刻畀班波甩拖？相信「寸王」都希望今晚成功奪標，等自己正式成為史上首位喺4個唔同頂級聯賽奪標嘅教頭。


皇馬今場原則上會強陣出擊，其中C朗目前同宿敵美斯同樣取得43個聯賽入波，爭歐洲金靴獎根本唔容許放鬆。C朗同奧斯爾合作無間，前線拍檔賓施馬又腳風大順，今晚想大捷又有幾難？就算迪馬利亞累積5黃停賽休戰都冇有怕！

C朗數胡爭做金靴射手

畢爾包呢邊，仲有機會做歐霸盃同西班牙盃雙料冠軍，依家喺聯賽踢緊風流波，最緊要係班主力唔好有任何傷病，求其保持到狀態就掂，落到場你都唔使旨意佢哋去搏。睇番佢哋上輪聯賽，對住聯賽榜尾2嘅薩拉戈薩都吞兩蛋，睇佢哋今晚都冇本錢做攔路虎啦！

橫數千軍

畢爾包對賽往績蝕底

‧近6季主場鬥皇馬得1勝5負，入4球失15球。

‧射手洛蘭迪近3場主場戰均有入波。

皇馬平均每場入3.2球

‧近4次交手全勝，入17球失3球。

‧為西甲進攻王，35戰入112球，平均每仗入3.2球。