富咸頂得住半力紅軍

猪拉多纳

01/05/2012
文： Kit

英格蘭足總啱啱宣布鶴臣係國家隊教頭唯一候選人，呢個消息夠晒爆冷！小妹唔知佢能否喺6月一舉成名，但以往佢執教稍為有名氣嘅國米、利物浦都冇乜好下場。不過換個角度睇，如果大家當英格蘭係富咸、西布朗之流，鶴臣話唔定畀到大家驚喜呢！咁啱佢教過嘅利物浦同富咸今晚就喺英超碰頭，小妹今場力撐富咸作客頂得住留力嘅紅軍！（有線200及300、廣東體育周三凌晨2：45直播）

利物浦留力足總盃鍊車

季尾買波先睇球隊目標，利物浦踏入2012年後都無乜好波踢過出嚟，好在贏咗個聯賽盃冠軍攞到下屆歐霸盃資格，否則依家有得震冇得瞓。佢哋今季最終目標已經放喺周六場足總盃決賽度！雖然射手蘇亞雷斯上場連入三球氣勢如虹，但估計今晚杜Sir未必派佢上陣，留力決賽對弗爆嘅車仔方為上策！


紅軍嘅晏菲路球場今年變咗做暗黑主場，事關佢哋主場嘅成績真係差到離譜，聯賽只贏過拖肥糖咁大把！相反富咸近幾仗氣勢唔錯，剛戰輸畀喺季尾大發雄威嘅愛華頓實屬情有可原！今仗小妹有信心富咸半場起碼可以先頂住個和局，事關近5年兩隊10次對碰有8場開半和，數據夠硬淨，話唔定富咸分分鐘喺下半場偷埋雞都唔奇，就好似維拉、韋根同西布朗之前作客晏菲路都冇有怕啦！

近10次對碰8開半和

事實上，今季利物浦除非可以先入波順順利利，否則畀對手站穩陣腳嚟踢根本完全冇計，加上今仗又有足總盃後顧之憂，小妹睇好富咸半、全場都頂得住，2.3倍半和同2.4倍「讓球客勝」都值得一博！

橫數千軍

紅軍主場勝率低


‧聯賽主場5勝9和3負入得20球，勝率只得29%，排英超倒數第5。

‧近8場3勝1和4負，只得1場無失波。

富咸近戰旺開單

‧近8場獲3勝1和4負，有6場開單。

‧近6次作客利物浦未贏過，得2和4負，對上5次半場均開0：0。

KIT推介：富咸（半場和、讓球客勝）

有線球彩台主持KIT

電郵：soccer64@cabletv.com.hk

PHONE波熱線：1831 678

「球彩俱樂部」開放時間：周二晚10：30至11：45