曼城終極狙魔

猪拉多纳

30/04/2012
文： 蘇豪

英超曼市打吡一戰定冠軍，富豪球會曼城主場迎擊死敵曼聯，曼城老細文梳亞狂燒過百億，等咗接近四年就係等今日，希望一舉殺敗「紅魔鬼」成為英超霸主兼曼市一哥，如今黃金機會擺在眼前，大軍挾跨季聯賽主場廿七戰廿五勝靚績而來，大有不勝無歸之勢，讓平半強捧上盤！（有線300及200台周二凌晨3時直播）


英超尚餘三周，曼聯喺榜首領先曼城三分，今場如能保持不敗，有望第二十次成為英格蘭頂級聯賽冠軍。「紅魔鬼」尾二嗰輪主場對史雲斯，煞科戰作客關係密切嘅新特蘭，阻力同樣唔大，喺佢哋角度睇，只要今戰唔輸，基本上穩奪冠軍！曼城形勢處下風，若想重奪爭標主動權，拎一分唔夠，特別係佢哋下輪要作客硬撼紐卡素，隱藏失分危機，若然今次喺主場贏唔到，咁就好有機會Game Over！

「腦殘」復出多把降魔劍

曼城老細文梳亞自○八年入主後足足使咗過百億，近四年來只捧過一次足總盃冠軍，付出同收穫完全唔成正比。曼城用錢堆砌豪華陣容，個個球員都當自己係大牌球星，要佢哋為球會賣命唔易，難得依家連麻煩友泰維斯都回心轉意專注踢波，而且「腦殘」巴洛迪利停賽期滿可候命，呢把神經刀喺大戰時有神來之筆，首循環作客奧脫福屠殺曼聯一役包辦頭兩個士哥，今次隨時再拮死「紅魔鬼」！

曼聯3分領先「心態曖昧」

曼聯本來喺榜首擁有八分領先優勢，冠軍幾成囊中物，唔知佢哋係咪覺得咁拎冠軍唔夠刺激，竟然喺韋根同愛華頓身上失咗五分，上場對「拖肥糖」贏住兩球大好形勢下被逼和，實在冇得原諒，如果最終真係失落冠軍，絕對係咎由自取！「紅魔鬼」形勢上唔輸就掂，呢種心態先係最危險，曼城背城借一非勝不可，主場出擊擺出獅子搏兔之勢，曼聯若齋守唔攻，個勢實輸晒，有乜依郁先失，想追番都幾難！

曼城「必勝決心」撐上盤

曼聯近期踢落「立立哋」，但陣容變動空間有限，右閘拉菲爾達施華頻頻孭鑊，難保正選位置，快翼艾舒利楊格插水技巧高，仍有機會喺關鍵大戰被委以重任。曼城依家人齊到不得了，連貴價射手迪斯高都要長坐冷板櫈，阿根廷孖寶阿古路同泰維斯弗到漏油，大軍喺聯賽主場跨季廿七戰廿五勝二和，勝出率超過九成，今場係坐和望贏格局，依家小讓平半，買一份鬥志，用半個博一個，不妨一試！

曼聯 35戰83分　球差+54

餘下賽程

06/05 主場Vs史雲斯

13/05 作客Vs新特蘭

曼城 35戰80分　球差+60

餘下賽程

06/05 作客Vs紐卡素

13/05 主場Vs昆士柏流浪

打吡倒後鏡

日期 賽事 戰果

08/01/12 足總盃 城2：3聯

23/10/11 英　超 聯1：6城

07/08/11 社區盾 聯3：2城*

17/04/11 足總盃 城1：0聯*

12/02/11 英　超 聯2：1城

11/11/10 英　超 城0：0聯

17/04/10 英　超 城0：1聯

28/01/10 聯賽盃 聯3：1城

20/01/10 聯賽盃 城2：1聯

20/09/09 英　超 聯4:3城

註︰前者主場，*中立場