車仔收油放生QPR

猪拉多纳

29/04/2012
文： 阿占

啱啱打入歐聯決賽嘅車路士，今晚會喺英超主場迎戰昆士柏流浪。車仔嚟緊嘅目標，只係集中踢足總盃同歐聯兩場決賽，反而喺聯賽嘅戰意唔多靠得住；對家昆士柏就要急切搶分護級，鬥心爆棚，隨時贏多鋪唔奇，一於博2.9倍「讓球客勝」！（有線200、300及廣東體育周日晚8：30直播）

QPR為護級戰意勁爆

首先提提大家，嚟緊5‧19歐聯決賽車仔鬥拜仁會有3D版本直播，大家記得做定準備喇！講開歐聯，車仔淘汰巴塞所付出嘅代價勁大，加利卡希爾勇戰受傷，加埋之前養緊傷嘅大衞雷斯，兩大中堅齊齊打柴，防線令人擔心。


咪忘記車仔上場波大部分時間10人應戰，體力又點會咁快回復到呀？查實藍戰士只要搞掂場歐聯決賽，就唔使再為來季歐聯資格喺英超打餐死，迪馬堤奧又點會唔識計呢條數吖？


QPR今季兩鬥車仔，首循環贏1：0，足總盃作客亦僅輸1個12碼出局，表現硬淨。雖然中場核心泰拉拔要坐波監，但呢班球員嘅鬥志真係唔講得笑，近兩個月先後擊敗過利物浦、阿仙奴同熱刺等豪門，今場對住無心戀戰嘅車路士，莫講話要執1分，就算贏埋都唔奇！

頂占筍盤

昆士柏流浪（讓球客勝）


有線球彩台主持 阿占

電郵：soccer64@cabletv.com.hk&#8231hone波熱線：1831678　

「球彩俱樂部」開放時間：周日晚10:30至晚11:45