更改亞協盃資格玩法有必要嗎？

猪拉多纳

29/04/2012
文： 波男

球季就快結束，波總正為來季賽事安排徵集意見，其中亞協盃資格更改玩法最奇怪，主要針對銀牌冠軍取得亞協盃資格嘅問題，據講呢件事係由波總董事會提議，甲組會大致同意，交還波總研究就會落實。


亞協盃資格一直都係由聯賽冠軍同一項盃賽冠軍（銀牌）嘅球隊參賽，但今次波總突然認為聯賽冠軍可以繼續獲得亞協盃資格，但銀牌冠軍就唔夠代表性，諗咗個據聞更刺激嘅方案，認為咁樣可以提高賽事可觀性喎。


以前嘅銀牌冠軍係採用單淘汰賽制，一支球隊贏３場就攞冠軍，又真係幾兒戲，但今屆銀牌已經改咗用主客制兩回合淘汰制，捧盃球隊至少要打５場、甚至７場波咁多，係經過真正考驗，但波總仍然話要改，真係有啲教人莫名其妙。

打多幾場馨香啲

決定亞協盃資格嘅方案，仲要等待波總公布，但都不外乎加埋其餘盃賽冠軍例如足總盃、聯賽亞軍等，再搞個季後賽之類，打多幾場至攞到個亞協盃資格，可能波總覺得，咁樣會馨香啲啩？


改賽制其實冇話好唔好，但係咁多年來波總最引人咎病嘅就係一時一樣，最怕就係搞得太複雜，又做唔夠宣傳，球迷都唔知你搞邊科而放棄入場，咁就得不償失啦！