殘車難炒昆士柏

猪拉多纳

29/04/2012
文： 蘇豪

車路士喺歐聯淘汰巴塞隆拿昂然進身決賽，佢哋大半場打少個守足全場，後遺症係帶住大批疲兵返國，今輪英超喺主場同仇家昆士柏流浪上演倫敦打吡，主帥迪馬堤奧勢必大刀闊斧輪換，殘「車」匆匆再戰難大炒，要細盤！


（有線300及200台周日晚8時30分直播）


車路士仍需搶分爭入前四，不過大軍啱啱踢完歐聯史上其中一場經典戰役，為免搏殘班兵，相信會畀林柏特及杜奧巴等休戰，預期陣容會面目全非，情況同前仗對阿仙奴頗為相似，要維持近期水準有啲難度，特別係球隊後防主力伊雲洛域停賽，中堅加利卡希爾同大衞雷斯都有傷，防線唔齊人，自然唔敢踢得太進取，將會穩中求勝。

昆士柏客場蟲獻「細」

自從首循環發生泰利種族歧視安頓費迪南事件後，昆士柏球員勁憎車路士，今次仇人見面，必定分外眼紅，再加上依家佢哋仲要護級，搶分決心好大。不過，昆士柏流浪係英超No.1客場蟲，聯賽作客十七戰輸十二場，上次作客搶到分係接近三個月前嘅事，對上五場作客輸晒，今次仲有「扭神」泰拉拔停賽，前線創造力弱，大舊中鋒森莫亞孤掌難鳴，預期呢場士哥唔會多。