希杭護級「客勝」易索

猪拉多纳

28/04/2012
文： 鄭少偉

周中歐聯4強次回合踢完， 西甲兩大班霸齊齊收工，賽果亦話畀大家知足球世界係冇絕對嘅！嚟到季尾階段，有唔少球隊冇嘢好爭又唔愁降班，可以大踢風流波戰意難測， 今晚西甲頭場愛斯賓奴對希杭，表面上實力係兩班波，但「亨利」就覺得愛斯賓奴唔係咁易贏，一於敲「讓球客勝」！（now632台周日凌晨0：00直播）

傳愛斯賓奴季後大清洗

西班牙足球近年繁華盛世，但查實只係表面風光，背後唔少球會都負債纍纍，就算巴塞同皇馬人氣咁勁兼搵咁多錢，都孭住一大條街數，唔少中小型班更瀕臨破產邊緣。好似今晚主場嘅愛斯賓奴咁，因為管理不善，搞到依家孭住十幾億港紙外債，家陣雖然話仲有機會爭踢下屆歐洲賽，但「亨利」就懷疑以佢哋嘅兵源夠唔夠應付多條戰線。


有報道話愛斯賓奴今年夏天會大清洗，將大部分主力賣走套現還債，今季表現搶眼嘅羅馬歷同菲臘比古天奴都係借番嚟嘅，賣埋剩低踢得嘅主力，出年隨時一開季就要為護級而戰，今日唔知聽日事，佢哋究竟有冇決心搶分爭歐洲賽資格自然成疑！


相反客軍希杭就好少理，為咗留低喺西甲，今場肯定搏到飛起，家陣佢哋仲有一線生機，戰意唔使懷疑，一於撐佢哋2.3倍「讓球客勝」！