拿玻里唔赦殘陣羅馬

猪拉多纳

28/04/2012
文： ComboKing

今日阿King會集中研究意甲，周日凌晨舉行有羅馬主場對拿玻里。季尾階段羅馬狀態又回落，慘吞祖雲達斯四蛋之後，剛啱鬥費倫天拿又係主場輸波。羅馬演出欠佳，今場讓唔起拿玻里，開平手盤可捧客隊。


（周日凌晨2時45分開賽）


羅馬今場要以殘陣迎敵，事關拉美拿、奧斯華度及迪羅斯停賽，另外正副門將史基倫堡及盧邦都因傷缺陣，再加埋一對中堅祖安及貝迪素仍未康復，羅馬可動用嘅球員真係唔多。況且連續兩場失利後令球員士氣受到嚴重打擊，今場難向拿玻里構成威脅。相反拿玻里決心爭取來季歐聯資格，今場一定會主動搶攻，前鋒卡雲尼亦已經回復勇態，入球能力肯定有保證，平手盤捧客隊坐和望贏。

卡利亞里巴勒莫串Ｗ

而較早時間有兩場比賽舉行，其中卡利亞里主場對基爾禾，主Ｗ可優先留意。基爾禾近況麻麻地，主要原因係爭勝推動力不足。卡利亞里仍未百分百護級成功，鬥志應比對手強。至於西西里島打吡戰，巴勒莫主場對卡坦尼亞，同樣選擇主Ｗ。最近巴勒莫同總監彭路基解約，球隊老闆森柏連尼覺得彭路基冇料到，上任之後防守力仲衰過以前。依家冇咗彭路基喺度阻頭阻勢，巴勒莫可重新睇好。