新丁判官吹雞疑利益輸送

猪拉多纳

24/04/2012


巴塞今晚主場對車路士，可能獲球證「幫助」晉級？皆因英傳媒賽前指歐洲足協喺今場極重要嘅4強戰，竟然搵咗一名新丁執法，本來已好唔合理，更發現呢名新紮判官嘅國籍，更同一位歐洲足協高層、被視為巴塞契爺嘅艾斯克一樣係來自土耳其，難免被人認為有利益輸送嘅嫌疑。


歐聯執法經驗僅1年貨仔


巴塞今晚主場對車路士極之關鍵，點知歐洲足協賽前卻指派土耳其籍球證卡基執法呢場大戰，結果被英國多個傳媒炮轟，全因呢位僅35歲嘅球證，執法歐聯經驗只有1年多，之前只係吹過3場分組賽，同埋喺馬賽對國際米蘭嘅16強首回合執過法，完全係新丁一名，今晚突然被委派吹歐聯4強，難免被人覺得唔夠班。


巴塞契爺及球證都係土耳其人


咁點解卡基無端端會上位呢？英國《獨立隊》就指，卡基今場之所以能夠執法，可能係一樣嚟自土耳其嘅歐洲足協高層艾斯克暗中安排，絕對係巴塞球迷嘅喜訊。




據報道指，目前身兼歐洲足協執行委員會副主席、歐洲足協球證委員會副主席等多個要職嘅艾斯克，原來仲係巴塞近年波衫贊助商——聯合國兒童基金會嘅項目主管，近年已多次被指暗中協助巴塞，如同對方嘅契爺，關係咁敏感，家陣仲要指派同鄉執法巴塞嘅賽事，試問卡基點逃得過瓜田李下嘅嫌疑？