大把「自己友」 紅魔笑住嚼拖肥

猪拉多纳

22/04/2012
文： 走肖

情與義、值千金，雖然菲臘尼維利離開曼聯多年，但係人都知道佢依然流緊紅魔嘅血。曼聯今晚英超主場對愛華頓，1.78倍「讓球主勝」抵追，因為「拖肥糖」隊長菲臘尼維利、中場吉遜同門將侯活全部係曼聯「自己友」，根本唔似會阻佢哋捧盃，戰意成疑要避。（有線200、300周日晚7：30直播）

愛華頓「紅魔」戰意成疑

兩個多星期前，菲臘仔已經公開話，希望曼聯喺「曼市打吡戰」前提前封王。依照當時形勢，紅魔應該要打沉愛華頓至有機會提前3輪捧盃，如果菲臘仔唔係先知，就梗係潛意識諗住鬆章。事實上，07年菲臘仔試過擺烏龍累愛華頓失波，間接送曼聯上冠軍寶座，佢有冇心同恩師費格遜過唔去，大家自己諗。


除咗菲臘仔，愛華頓正選陣容中嘅吉遜同侯活，都受過費爵爺恩惠，而佢哋領隊莫耶斯，對同樣來自蘇格蘭格拉斯哥嘅費格遜又敬重有加，反而前年佢同曼城領隊文仙尼有牙齒印，試過同對方嘈交搞到同時被逐，睇怕莫耶斯都唔會幫文仙尼打江山囉！

史高斯旺場正選贏晒

就算唔講陰謀論，曼聯近10場聯賽主場有9勝1負，贏波率達9成，當中有7次至少贏2球，史高斯復出後聯賽10次打正選全勝，路爾斯華倫西亞同拉菲爾達施華近5次同時正選亦贏晒，愛華頓有巴尼斯受傷，德倫特因紀律問題被棄用，估計菲臘仔要改踢左後衞，突然變陣邊似惡得出？

橫數千軍

紅魔主場例先入波


‧朗尼連續5場聯賽主場先開紀錄。

‧近6場4次半場領先、2次打和。

拖肥近戰旺開雙

‧連續5季作客曼聯輸波。

‧近6場5次開入球雙。