紐卡素可破Big4壟斷

猪拉多纳

21/04/2012
文： 江忠德

一命二運三風水，唔係鼓吹迷信，改咗球場冠名之後嘅紐卡素，成績一路飆升，依家有機會踢下季歐聯，球員搏甩髀希望夢想成真，鬥志鮮明；相反，史篤城無欲無求，不如幫吓「喜鵲」撕破四大豪門壟斷局面。


未改名前嘅聖占士公園球場，一直都係客隊聞風喪膽嘅地獄主場，可以容納超過五萬球迷，屬於東北部最大足球場，「喜鵲」球迷當然係引以為傲，當舊年11月宣布改名嘅時候，好多球迷拒絕接受事實，但係眼見球隊戰績咁醒，依家變成支持。


紐卡素由中游攀升到同熱刺並列第5位，主要靠主場頻頻高奏凱歌，老實講句，如果話單係靠改名就呃人嘅，更重要係贊助商肯泵水，球員就醒神，仲有喺戰術上，徹底發揮穩守突擊威力，無論對住邊隊都收效。史篤城家陣高不成低不就，夠晒資格做俠盜羅賓漢，幫助紐卡素突圍而出。