士砵亭主場惡歎包

猪拉多纳

19/04/2012
文： 笛子波童

今屆歐霸盃決賽會否上演西甲內訌？先要問過葡超士砵亭！周五凌晨四強首回合，士砵亭先於首都里斯本嘅主場布陣迎戰畢爾包，主隊今屆歐霸盃主場七戰全勝，強如曼城亦係佢哋手下敗將，畢爾包對上兩圈鋒芒太露，平手盤波童撐士砵亭。（有線62及202台周五凌晨3時05分直播）


士砵亭今屆歐霸盃踢咗七場比賽全部贏晒，代表作係十六強以一比○擊敗曼城，再數遠啲，佢哋近十一場主場歐洲賽取得十勝一和，勝出率達九成，主場威力唔可以睇小。士砵亭上周末聯賽以一比○擊敗國內勁旅賓菲加，近八場主場全勝之餘，更有七場保持清白之身，唯一失波係八強對米達列斯補時階段所失嘅十二碼，足證防守夠硬淨，今場開出平手盤實在好抵玩。

畢爾包風頭勁難偷雞

畢爾包對上兩圈先後淘汰曼聯及史浩克04，當中兩次首回合作客都能贏波而回，為出線打好基礎，不過正因為咁，反而會令士砵亭唔敢再大意，而且去到四強階段，相信大家都會踢得比較謹慎，畢爾包面對主隊銅牆鐵壁，未必會如對上兩圈般搶攻，捧主隊之餘，不妨補個入球細。