飛腳訪賓約哥入球停不了

猪拉多纳

18/04/2012
文： 走肖

「超攻擊復活」！烏茲別克班霸賓約哥今晚喺亞冠盃E組主場再遇日本兵大阪飛腳，1.68倍入球大最抵玩。現時兩隊各得3分，為爭出線今場必定搏命。飛腳自從解僱教練施拉奧後生猛晒，最近更加踢番出以往擅長嘅進攻足球，連續3場開入球大，難得翻生當然要食住上。（now671台周三晚8：00直播）


飛腳炒球會Icon西野朗魷魚後，安排巴西教練施拉奧領軍，點知遭遇「鐵達尼式災難」開季5連敗，好在高層夠果斷，解僱施拉奧搵到新教練松波正信領軍，佢上任後即刻話要令「超攻擊復活」，結果冇令球迷失望，領軍4場得2勝1和1負攻入8球，包括上次交手贏賓約哥3：1，同埋聯賽落後2球大逆轉以3：2反勝川崎前鋒。


雖然飛腳今場有中場大腦遠藤保仁停賽，前鋒保連奴奧利華拉養傷，不過佢哋已經踢番有前冇後嘅進攻足球，唔會因為少咗邊個而改變風格，更何況新教練松波正信用人大膽，上任後即刻派中場倉田秋打正選，最近用前鋒佐藤晃大擔正，又成功令佢大爆發「兩戰連發」（連續2場入波），又使乜擔心冇波入？

賓約哥3場分組賽都入波

對家賓約哥前幾年有巴西教練史高拉利領軍，又曾經有過氣森巴球王李華度壓陣，雖然家陣陣容冇咁勁，但都叫做有踢過拿尼沙嘅前鋒高沙克負責爭取入球，加上澳洲國家隊中場大衞卡尼，點都唔似會扯白旗任砌。最低限度，賓約哥連續3場分組賽有波入，呢場關乎雙方出線命運，點會死守咁衰仔，捧入球大啱數。