鄭雨滇連勝四日好好運

猪拉多纳

華籍好手鄭雨滇早前因為導致柏寶墮馬被罰停賽，復出之後表現一直好理想，連同尋日隻「好好運」在內，已經連續贏咗四日。好可惜阿滇可能遲吓又要抖抖，事關佢前排因為感冒食過啲含有違禁物質嘅藥物，搞到過唔到月初嘅抽樣藥檢。呢單嘢已經排咗期喺聽日審，又姑且睇到時使唔使罰。不過競賽小組已經講明，無論研訊結果係點，阿滇都可以喺周三夜賽上陣，以免排位之後又要換人。
       
好好運中檔衝上一攻而破。
克服不利12檔

講番「好好運」，葉楚航話隻馬不嬲都係後上最好，只不過上次沿途被迫走四疊，白白斷送機會。航哥仲話今場排十二檔，跑法唔輪到佢揀，好在滇仔夠生性，克服到不利形勢贏馬。