祖雲達斯鋒線利過刀

猪拉多纳

15/04/2012
文： Sherry

哈哈！好開心呀！小妹上星期某晚重拾「久違了」嘅掟鏢樂趣，喺比賽入面攞到亞軍，依家間中諗番起當晚嘅情景，都依然覺得好開心！嘻！趁小妹行緊運，一於食住個勢，推介同小妹一樣咁旺嘅祖雲達斯1.73倍「讓球客勝」畀大家啦！（開賽時間：周日晚9：00）

派路 「老金童」寶刀未老

「阿婆行得快，一定有古怪！」係呀，「老婦人」祖記真係勁到得人驚囉！上周中意甲開快車，個個都諗住祖雲達斯未必贏到拉素啦，點知成場波祖記都佔盡上風，到比賽末段迪比亞路一記靚絕自由球，咁就射瓜「意甲3哥」拉素，真係睇到小妹成個呆咗！咁梗係啦，家陣祖記Lead住AC米蘭1分，形勢咁緊湊，祖記有咩法寶都要拎晒出嚟，搶番個意甲冠軍嘛！


「老婦人」唔單止鬥志高，仲連實力同陣容都鬼咁完整。「老金童」迪比亞路繼續可以候命，萬一咬唔入對手，都可以換邊後上陣做救世主；最重要係佢哋件中場指揮官派路，經過早排休養復出後表現愈嚟愈好，有佢分波畀柏比同馬特尼等土炮殺手，仲使驚祖記冇波入咩？

切塞納等降班14戰不勝

對家切塞納就慘咯，家陣包艇之餘仲要離護級安全區成15分咁多，擺明等降班啦！鬼咩，呢班波根本係拉雜成軍，將啲賣剩蔗Group埋一齊當係一隊波，梅度都過晒氣啦，仲旨意佢入波喎，難怪切塞納連續14場聯賽未贏過啦！最慘係佢哋今仗仲有過半打傷兵，守將雲貝根、普迪爾、馬高柏洛路、卡達朗尼同哥莫圖統統打柴，中場佐治馬天尼斯同最有卡士嘅前鋒伊亞昆達都未必踢得，陣容削上加削，輸少粒都要還神啦！

Sherry靚盤：祖雲達斯（讓球客勝）

百足咁多爪嘅大學生，熱愛運動，最鍾意同啲Friend唱K兼睇波，曼聯中場路爾斯安達臣同車仔前鋒費托都係佢杯茶！

微博傳情 \(^O^)/

小妹喺公司嘅好友Joey唔做喇，雖然好唔捨得兼有啲傷感，但「天下無不散之筵席」，小妹喺度都祝佢前程似錦啦！哼，至於另一位好朋友，竟然掉低我喺香港，自己一個走咗去旅行！嗚呀！唔制呀！你快啲返嚟陪我呀！