熱刺車仔合演4強「大」激戰

猪拉多纳

15/04/2012
文： 力奇

英格蘭足總盃4強今晚喺溫布萊上演，由熱刺同車路士合演「倫敦打吡」！力奇睇好呢場會係入球騷！事關車仔急於捧盃求交代，中前場個個上足子彈等開火，熱刺則有艾迪巴約及雲達華治復任正選，擺明鬥攻，1.88倍入球大抵捧。（now671及672台、廣東體育周一凌晨1：00直播）


熱刺同車仔由「英超四哥位」鬥到嚟足總盃，正所謂仇人見面，今晚雙方肯定會駁火鬥攻。雖然車仔下周中有場歐聯4強首回合要踢，但面對「地上最強」巴塞，老實講，想晉級真係難過登天，反而只要砌低熱刺，決賽對手只係利物浦，牌面上車仔都係秤高多少，主帥迪馬堤奧想捧盃求長約，又點會捨易取難唔搏足總盃？


事實上，車仔嘅進攻能力近排已逐漸重返高峰，進攻中場林柏特搵番射門鞋，配上演出穩定嘅杜奧巴，已經係入球保證，何況後備席仲有狀態同信心明顯冒升緊嘅費托，根本唔愁冇波入。熱刺呢邊，艾迪巴約同雲達華治上場聯賽都踢咗唔夠半場，擺明留力踢今鋪，餓波搏殺，要省1、2粒有幾難？

車仔伊雲洛域停賽

再者，兩班波嘅防線都畀力奇一種穿窿嘅感覺，車仔守將伊雲洛域坐3場波監，要搵到前葡萄牙國腳保羅費拉拿頂替，喂，佢今仗對手係又快又弗嘅熱刺翼鋒加里夫巴利，靠佢一個點頂呀？仲有，隊長泰利早排先話兩條肋骨骨裂，依家佢同足踝傷嘅A高齊齊頂硬上復出，有冇貨交真係難講。

熱刺卡保奧未必披甲

熱刺呢邊，隊長玻璃腳京治同樣要紮住上，賽前仲有消息話連卡保奧都未必出得，連埋之前抖緊嘅戴臣等，夏利列納隨時焗住用未完全傷愈嘅加拿斯出征，搵佢嚟Mark「魔獸」，講笑咩？

橫數千軍

熱刺對賽唔輸蝕

‧之前8次同車仔喺英總交手，各贏4次。

‧曾18次殺入英總4強，有9次進身決賽。

車仔足總盃專家

‧近4次與熱刺交手，有3次和波。

‧對上5屆英格蘭足總盃共贏得3次冠軍。