AC傷兵多寧取讓球和

猪拉多纳

14/04/2012
文： 鄭少偉

球員身價動輒都億億聲，佢哋有咩頭暈身慶，球會高層就最閉翳，所以成功嘅球會除咗要有星級球員同教練之外，一定要有優秀嘅醫療團隊做後盾，AC旗下嘅米蘭實驗室，號稱係最先進嘅運動醫療團隊，但今屆「紅黑兵團」傷兵滿營，今晚殘陣喺聖西路迎戰作客平平嘅熱拿亞，就睇吓米蘭實驗室保唔保得住個金漆招牌嘞。


AC米蘭擁有分析球員體能同比賽狀態嘅電腦系統，一班戰將每日嘅訓練量、操練表現、飲食，甚至着咩boot等全部記錄晒，教練團隊可以根據電腦統計資料，了解球員嘅狀態，藉此避免不必要嘅傷病。

熱拿亞近10次作客輸8場

雖然講到咁巴閉，但今季AC米蘭嘅傷兵問題仍然嚴重，有數據統計佢哋有9成球員，都因為唔同嘅傷患問題缺陣。由於賽事頻密，況且一班「紅黑軍」年紀都唔細，要踢足全部比賽根本就冇可能，睇番近幾場比賽，一眾AC球員好似成日跣低，除咗因為草地質素欠佳，亦正正因為佢哋出現疲態，今晚對住近10次作客輸8場嘅熱拿亞，要全取3分力追祖雲達斯應該唔難，想要大炒就確有難度嘞，一於扒冷博佢哋僅熟，「讓球和」有3.7倍值得一博。（now633、660台及中央5台周日凌晨0：00直播）