紅軍拖肥半場打激D

猪拉多纳

14/04/2012
文： 查理阿蛋

今個周末對於利物浦及愛華頓意義重大，兩軍除咗今晚喺足總盃４強交鋒，聽日更係希爾斯堡慘劇23周年紀念日，相信默西塞德郡雙雄即使移師溫布萊球場對決，仍然想喺呢個重要日子踢場好波以祭96名亡魂，大戰味濃預期兩隊必先以穩陣波應戰，上半場唔易分出勝負，1.95倍「半場和」值博。（now671、672台及廣東體育周六晚7：30直播）


發生於1989年嘅希爾斯堡慘劇，唔單止奪去咗96條人命，當年英國《太陽報》嘅失實報道，更令利物浦市發起罷睇該報行動，足見呢件事不單對紅軍，即使對市內球迷都係咁刻骨銘心。今晚呢場打吡大戰臨近紀念日舉行，可以想像對兩隊同球迷有幾咁重要。

利物浦把握力差唔易入波

雖然利物浦啱啱有高莫利等要員離隊，反映隊中問題不少，不過喺呢個重要日子對正同市死敵，土生土長嘅「Scousers（利物浦人）」如謝拉特、加歷查同史比寧等必定加多幾錢肉緊，小妹絕對唔擔心佢哋冇火，只可惜以紅軍今季嘅把握力，要喺上半場領先確實唔容易。


門將連拿同杜尼雙雙停賽，令利物浦要派第三門將巴利鍾斯把關，好彩丹尼爾艾格復出令防線回復季初嘅硬淨本色，就算「拖肥糖」有10場入5球嘅謝拉域，要劏穿「紅牆」都難度不小。何況利物浦中前場嘅組織力始終較勝一籌，愛華頓比賽初段必先求不失，門將侯活都話上次聯賽造訪晏菲路遭謝拉特3度破門令球隊蒙上陰影，今仗佢哋點敢喺早段冒險搶攻？半場開D（和波）真係唔奇。

愛華頓驚輸唔敢搶攻

原來紅軍對愛華頓係足總盃史上出現得最多嘅準決賽組合，4次對賽中前者贏足3次，愛華頓唯一一次淘汰紅軍已經係1906年。不過撞啱「拖肥糖」近5場4勝狀態大勇，對住近況麻麻嘅利物浦當然想威番次，睇怕今晚喺溫布萊必定鬥得難分難解，大家等睇好波啦！

橫數千軍

 紅軍4強戰過5成晉級

‧第23次打入足總盃4強，過去22次有13次進身決賽。

‧2000至01球季曾同時奪得聯賽盃及足總盃。

 拖肥謝拉域腳風順

‧曾於足總盃準決賽11次遭淘汰，為賽事史上最多。

‧謝拉域加盟後上陣10次已射入5球。

足總盃賽制：

4強賽事採一場決勝負，若90分鐘內打成平手，需加時30分鐘，若加時仍未分高下，則以互射12碼決勝。