史浩克做東驅蜂

猪拉多纳

14/04/2012
文： 蘇斯黑柴

今晚德甲重頭戲肯定係史浩克04主場對多蒙特，魯爾地區最強打吡戰一直以嚟都非常火爆，今次對壘更加火上加油，「蜜蜂兵團」多蒙特只剩下四輪賽事已經領先次席拜仁六分，只要闖過今晚呢關，聯賽冠軍幾可手到拿來。不過史浩克已做足一切準備，今晚決心瞓身做攔路虎，以佢哋嘅超強攻力，疲兵多蒙特唔易捱，史浩克主場受讓，黑柴捧「讓球主勝」。（有線61及64台周六晚9時30分直播）


史浩克擁有令人羨慕嘅頂級鋒線組合，前線魯爾、亨特拉爾同法芬3大攻擊手，無論級數同狀態都一流，魯爾同亨特拉爾今季聯賽已合共轟入38球，法芬喺前仗大勝漢諾威更踢出代表作，包辦球隊3個入球嘅助攻，亦有多次具威脅攻門。佢哋主場出擊向有保證，近10仗主場聯賽9勝1和，近4仗全勝共轟入12球。

幫拜仁奪冠可獲重賞

史浩克對今場打吡戰有超強爭勝決心，除要搶分確保季軍獲下屆歐聯直接參賽資格外，球隊季前出售門將紐亞予拜仁慕尼黑時，附帶特殊條款，倘若拜仁能夠奪得今屆聯賽冠軍，將會額外支付300萬歐元獎賞畀史浩克，今晚誓瞓身狙擊多蒙特，幫助拜仁保留爭標機會。事實上史浩克周中作客紐倫堡開賽時，就將弗爆嘅法芬留喺後備席，中場硬漢鍾斯亦早早退下火線，佢哋對紐倫堡全場hea踢，甘願受辱慘敗到1：4，一切一切都係志在留力搏今場。


多蒙特連場大戰唔易捱


多蒙特啱啱擊敗爭霸勁敵拜仁，目前士氣同狀態都唔使懷疑，本來職業球隊四日踢兩場好平常，但接連兩場超級大戰，除考驗球員體能氣力外，沉重心理壓力對精神亦虛耗極大，苦戰險勝拜仁未興奮完，能否立即集中精神迎接另一硬仗確成疑問，今晚作客面對強橫宿敵失分可能性甚高。