修咸頓讓波搵丁

猪拉多纳

13/04/2012
文： 麥馬拿仁

要做聯賽一哥，最緊要保持穩定食硬弱旅，鬥強隊失分都傷唔入肉。英冠榜首修咸頓欺善怕惡，近四個月鬥前七球隊韋斯咸、伯明翰、黑池、卡迪夫城同白禮頓均不勝。今輪鬥近期不敗率逾九成嘅雷丁，主場都冇甜頭，修咸頓讓波拿仁捧「讓球客勝」！（now 638周六凌晨2時45分直播）


目前修咸頓、雷丁同得八十二分，領先第三韋斯咸六分，球季僅餘四仗，兩軍來季大有可能齊齊直接升上英超。「聖人」修咸頓靈魂射手列基林拔，話今仗勝負不如想像中緊要，因為就算邊隊贏波，最後都有可能雙雙達標，反映出修咸頓只以平常心迎戰，戰意未算高昂。


「聖人」現以得失球較佳排榜首，某程度上係球隊好天斬埋落雨柴；事實上修咸頓近月失分數字遠高於雷丁，而球隊面對勁旅更非常不穩，曾輸畀白禮頓同黑池，鬥「錘仔幫」韋斯咸、伯明翰同卡迪夫城都只能打和，睇怕佢哋食唔到硬嘢。

雷丁不敗逾九成

雷丁氣勢如虹，近十五仗僅一敗，不敗率逾九成。佢哋配搭平均有前有後，射手羅拔斯落到英冠超晒班，門將費達歷斯上仗更救埋十二碼，憑藉高昂士氣可保不敗。