拜仁強鋒-2大炒「格」

猪拉多纳

07/04/2012
文： 亨格比利

拜仁慕尼黑近排贏到開巷，啱啱仲殺埋入歐聯4強，今晚回師德甲，當然想食住個勢贏多鋪。拜仁近期對住中下游分子例炒鑊勁，洛賓同馬里奧高美斯仲抖埋搏今鋪，今晚佢哋喺主場恭候作客最渣嗰隊奧格斯堡，入少粒都唔制，讓「-2」照撐1.95倍「讓球主勝」！（有線61周六晚9：30直播）

奧格斯堡客戰德甲最削

家陣拜仁喺德甲落後「一哥」多蒙特3分，不過「蜜蜂兵團」今晚造訪4連勝嘅禾夫斯堡相當惡啃，拜仁只要今鋪贏波，隨時有得霸住個頭位，戰意唔使懷疑！戰意旺盛，都要有好狀態做Backup嘅！拜仁近8戰7勝弗爆之餘，周中仲喺歐聯8強次回合輕取馬賽2：0，實力根本係大超班。上場休戰嘅洛賓同馬里奧高美斯會喺今仗復任正選，當中後者啱啱仲續咗新約至2016年，今鋪唔省番兩粒賀一賀佢點得？


對家奧格斯堡係德甲客戰最削嗰隊，14戰得1勝6和7負，點睇都唔似會偷到拜仁雞。最重要係拜仁近期對住中下游隊伍都交足貨，分別試過以6：0、7：1大炒哈化同賀芬咸，今仗鬥客戰包艇嘅奧格斯堡隨時又數鑊勁。