美斯攞威巴塞「-2」開「薩」戒

猪拉多纳

07/04/2012
文： 走肖

爭標大過天，薩拉戈薩今晚西甲主場對巴塞隆拿，好可能被撳住砌。近排薩拉戈薩翻生連贏3場，護級決心唔講得笑，但巴塞爭標冇失分空間，加上美斯被莊家睇好入球停不了，全季入多過66球得1.72倍熱到爆，咁巴閉，即使巴塞「-2」都要捧2.02倍「讓球客勝」搶分兼攞威！（now632台周日凌晨2：00直播）


薩拉戈薩死到臨頭終於發力，聯賽連贏3場見到護級曙光，而且贏嘅對手包括華倫西亞同馬德里體育會，睇落唔似虛火，連今季加盟嘅中鋒普斯迪加都開始交到貨。不過咁，今場佢哋有3件停賽，包括前鋒加西亞費南迪斯、中場艾邦奴同大衞馬堤奧斯，咁嘅環境點捧得落？

薩拉戈薩3件停賽

更何況，近7次對賽薩拉戈薩全部輸晒，完全冇反抗能力，被大炒有咩出奇？另一方面，巴塞剛啱喺歐聯8強打爆AC米蘭，美斯紀錄破完又破，依家佢喺西甲射手榜同皇馬嘅冤家C朗爭崩頭，無論為自己定為巴塞，佢都有需要砌低薩拉戈薩證明新球王嘅身價。


唔好忘記，兩隊近5次對賽美斯得1次冇波入，前年作客更連o趙三粒帶挈巴塞贏4：2。最近菠菜公司bet365開出盤口，今季攻入58球、8次連中三元嘅美斯，入夠66球或以上得1.72倍，上演至少10次帽子戲法得1.91倍，就算中堅碧基喺歐聯受傷避戰，淨係美斯都夠贏啦！