紅軍維拉合演救亡「大」騷

猪拉多纳

07/04/2012
文： 江忠德

利物浦喺英超輸到眼光光，依家嘅問題已經唔係戰績咁簡單，直情觸動到紅軍嘅「核心價值」同埋「深層次矛盾」，搞到咁嚴重，球員都唔想做千古罪人，對住維拉搏甩髀有前冇後，咁啱維拉亦要搶分護級，今晚兩隊隨時合演入球騷。


紅軍嘅「核心價值」係永不放棄精神，但自從捧咗聯賽盃，足總盃殺入4強後，球員喺英超明顯放軟手腳，近7仗輸足6場，畀人愈踢愈頹嘅感覺，尤其係上場畀紐卡素技術性擊倒，冇晒鬥志確令紅軍球迷極度失望。

分別為歐聯 護級而戰

至於「深層次矛盾」係美國老闆忍無可忍，同領隊杜格利殊嘅衝突日益加深，最難忍嘅係排名仲低過同巿宿敵愛華頓，完全凸顯「國王」戰術單調，球員似自由發揮多過整體戰術運用。紅軍冇歐聯資格都幾難有球星加盟，兼且季尾要反彈提防主將流失，家陣一條心進攻，入多啲波彌補番後防嘅失誤。


其實，維拉近況亦唔好得幾多，由原本冇乜護級壓力，淪落到降班邊緣，嚟緊幾場全部硬仗，依家梗係想趁紅軍病攞佢命，加上維拉對住強隊向來勒都勒唔住，隨時好似上場對車路士咁入球停不了。