戰車踩油韋根有難

猪拉多纳

07/04/2012
文： 力奇

車路士今晚返英超主場迎戰韋根，有權大勝一場！事關車仔雖有泰利肋骨骨裂缺陣，但補上嘅加利卡希爾同雷斯都係「得分中堅」，鋒力仲勁，而且呢架「烈火戰車」3連勝之餘仲殺埋入歐聯4強，以佢哋嘅實力加狀態，要炒韋根冇難度，1.58倍「讓球主勝」抵捧！（有線201、301及廣東體育周六晚10：00直播）


成功帶領車仔谷底反彈，殺入歐聯同足總盃4強，迪馬堤奧即時贏盡各界掌聲。車仔老大哥林柏特上星期仲擦晒鞋咁，公開勁讚迪帥領軍功力好過保亞斯幾百倍，就連曾經効力過車仔嘅挪威名宿費奧，尋日都走出嚟話迪馬堤奧係「車迷」嘅心水領隊，家陣上下一心，呢架「烈火戰車」撻着晒，真係唔講得笑！

車仔隊長要抖2至4周

係，雖然藍戰士家陣落後第4位嘅熱刺5分，要爭入前4難度唔細，但熱刺近排開始跌Watt，反而車仔自己嘅狀態就返晒嚟，就連之前廢到唔恨嘅費蘭度托利斯，都已經回復射手本色，頻頻士哥之餘仲交出唔少助攻，依家佢踢走杜奧巴重奪正選位置，肯定會省多幾粒報答迪帥咁信佢啦！到季尾藍戰士真係搶番個「四哥」位，一啲都唔奇o架！


「烈火戰車」目前唯一要面對嘅問題，就係隊長泰利上仗對賓菲加勇戰受傷，2條肋骨骨裂，估計至少要抖2至4周，有消息指佢要到歐聯4強鬥巴塞，先有些微機會復出。不過從另一面睇，車仔今晚對手只係韋根，擺番助攻力更強嘅加利卡希爾拍大衞雷斯，鋒力分分鐘仲得人驚！

韋根洛達列加打柴

對家韋根連贏利物浦同史篤城，係就係重燃護級希望，不過你叫呢班波今晚作客史丹福橋延續5場不敗佳績，力奇真係點都唔信囉，咁有料，就唔使搞到護級啦！咪忘記佢哋近3季作客車仔都輸晒，前季仲畀藍戰士炒8蛋添！而且佢哋件哥倫比亞前鋒洛達列加因傷缺陣，連反擊能力都冇埋，今晚隨時又畀藍戰士嘅「加雷組合」炒鑊甘！

橫數千軍

車路士4月旺爆

‧近10年喺4月踢英超主場未輸過，獲15勝8和。

‧近9場英超主場獲5勝3和1負。

韋根訪倫敦例衰

‧史上英超交手獲1勝2和10負。

‧近15場英超作客倫敦輸足14場，勁失46球。

賽果熱線：2707 9900　周六晚6時20分起至周日晚6時止