保頓強勢食住上

猪拉多纳

07/04/2012
文： SAMVO肥叔

投X季尾賽事，最重要秘訣一定要揀有目標嘅球隊，一係爭標、一係護級，一係爭歐聯入場券。今次重心推介英超護級分子保頓主場對富咸，保頓仲未上岸鬥心有保證，加上全隊都為患心臟病嘅梅姆巴而戰，鬥志更加高昂。富咸中游浮沉踢風流波，平手盤梗係要保頓。（有線304及204台周六晚10時直播）


保頓呢班波本身有質素，今季成績差屬於心理問題，但來到季尾點都要搏命，否則一旦降班，對球會及球員前途都會造成嚴重打擊。保頓近三場聯賽都贏波，證明佢哋已克服心理障礙。另外，中場梅姆巴心臟病入院亦刺激軍心，加強球隊凝聚力，相信可食住呢股氣勢，衝埋今季最後一段。至於富咸喺聯賽冇乜目標，而且近六場作客輸五場，今場冇運行。

狼隊五連敗繼續反

同樣要護級，包尾嘅狼隊情況就差好多，佢哋已連輸五場，歸根究底都係由於球會管治有問題，炒咗領隊麥卡菲之後，一直搵唔到合適接棒人選，現時只由欠缺經驗嘅干拿領軍，靠佢打護級戰真係嘥氣，今仗作客史篤城都係等劏。


德甲方面，禾夫斯堡主場對多蒙特，主隊近期好弗入波多，勒都勒唔住，多蒙特要力保一哥位置亦冇得縮，推介入球大。意甲阿特蘭大主場對錫耶納，阿特蘭大表現好硬淨，主場成績唔錯，可以睇高一線。

肥叔心水

熱刺 上盤


阿特蘭大 上盤

禾夫斯堡 大

保頓 平手盤

史篤城 上盤

薩拉戈薩 下盤

維拉利爾 下盤