丙組總決賽港足輝煌縮影

猪拉多纳

01/04/2012
文： 黃興桂

香港足總請咗新CEO，港隊亦有新教練，新人事新作風，可帶來新氣象，但亦唔可以忽視一班有興趣、有熱誠嘅本地球員同職員各施各法，以唔同方式對球壇作出貢獻，例如包括Peter在內等多位七、八、九十年代嘅球圈中人，由丙組做起，並有所成。


今季殺入爭升乙組嘅丙組聯賽總決賽四支球隊，包含過去四十年本港有分量球圈人士，除咗小弟領軍嘅荃灣之外，仲有由梁守志、康寶駒同林建名支持嘅丙甲球隊東方，佢哋用職業球隊資金組軍，請來李健和、羅繼華做教練兼球員，實力超班。另一支丙甲球隊屯門足球會，以前甲組會嘅屯門普高後生仔做班底。最後一支係同荃灣一樣屬丙組地區嘅東區，陣中有名將譚兆偉擔任教練兼球員。

免費好波咪錯過

四隊今季都搞得有聲有色，令人再睇到過去本港球壇光輝時期嘅縮影，證明足運一定要由有經驗、有辦法嘅人士組織，先至有成績。Peter可以喺呢個小舞台同過去對手及好友比併，有份深厚情懷。


丙組聯賽總決賽四隊踢單循環，頭兩名升乙組，今午一點半展開首輪比賽，荃灣對屯門足球會喺跑馬地仿真草球場舉行，東方對東區就喺馬鞍山仿真草球場上演。東方超晒班，睇吓邊隊可以同佢哋攜手升班，Peter希望荃灣可以踢出一貫紀律性，呢類免費好波，值得捧場架。


金句：提倡足運各施各法，皇天不負有心人