祖記拿玻里有大志

猪拉多纳

01/04/2012
文： 巨高

祖雲達斯教練干地及拿玻里教練馬沙利，本周將會再喺意甲同場比併。兩個教練唔單只想為球隊爭好成績，仲要證明自己先係今季意甲最佳教練，以贏取一年一度嘅金教練大獎（Albo Panchina d'Oro），料今晚祖雲達斯主場對拿玻里，兩軍都不作保留，全力進攻以爭取勝利三分，相信開出大盤機會極高。


（now 633周一凌晨2時45分直播）


咪以為金教練大獎只係個畀面獎座冇實際用途，查實好多知名教練都靠呢個獎去確立地位，而近年更成為執教國家隊嘅重要門檻，例如有「銀狐」之稱嘅納比就贏過兩次，另外現任意大利國家隊領隊柏蘭迪利同樣兩度獲獎，至於前任英格蘭領隊卡比路，仲贏過三次咁多，所以話唔贏番個金教練大獎，都好難喺教練生涯再創高峰。

對賽績旺大

而干地及馬沙利，兩位已被認定為近年上位最快嘅意大利教頭，若然柏蘭迪利喺今夏舉行嘅歐洲國家盃決賽周有乜冬瓜豆腐，前兩者當然會成為考慮接棒人選。為證明自己比別人優勝，由干地帶領嘅祖雲達斯，今場一定唔會放過拿玻里，同樣地，拿玻里鬥志不比任何球隊弱，提升球員士氣係馬沙利嘅強項。


兩軍目標鮮明，「二哥」祖記要力追榜首AC米蘭不容有失，而第四嘅拿玻里亦正與拉素及烏甸尼斯爭奪第三搶來季歐聯外圍賽入場券，既然兩隊都咁想贏，相信今場會踢得特別進取，有助產生大量入球。而對賽往績方面，拿玻里近三次作客祖雲達斯都開大盤，今場冇例外，大盤繼續追。