史雲斯隨時送禮

猪拉多纳

01/04/2012
文： 麥馬拿仁

熱刺領隊夏利列納季尾九成九離隊轉做英格蘭教頭；近日有傳史雲斯少帥羅渣士係接任大熱。今晚史雲斯作客熱刺，「天鵝」位處中游冇嘢爭，衰啲講句羅帥下季都想熱刺踢歐聯，今場或先送份大禮畀未來東家，一於捧熱刺「讓球主勝」！（有線300及200台周日晚11時直播）

助熱刺入歐聯

早前英超聯盟贊助商巴克萊，邀請廿位英超領隊選出本季各項最佳，其中67%選羅渣士為最佳教頭。史雲斯今季踢出悅目進攻足球，羅帥當然聲名鵲起，英媒指熱刺已經撬緊佢下季過檔。羅渣士當然希望執教大會，如果仲有得參與歐聯，真係威過威士忌，今場賣大包毫不出奇。


撇開陰謀論，熱刺實力在對手之上，而且為力保歐聯資格必定搏命，上場足總盃贏保頓三比一表現對辦，加上飛翼艾朗連儂復出，贏史雲斯兩粒正路。