狼隊愈踢愈曳 點讓保頓？

猪拉多纳

31/03/2012
文： 張志德

現代社會講問責，球圈亦然。球隊成績有乜冬瓜豆腐，領隊通常都首當其衝被炒，炒主帥係唔難，但炒人後有冇適合接替者？好多時唔係話炒咗領隊，球隊就即刻可以起死回生。


英超狼隊早前炒麥卡菲，明顯就係錯誤決定。麥帥帶領狼隊五年半，陣中球員大部分都係佢嘅子弟兵，今季踢得唔順，好大原因只係球會冇錢，限米煮限飯所致，麥卡菲其實帶得唔差。由於請唔起前新特蘭教頭布魯士，最終只係提升毫無執教經驗副練干羅頂檔，旨意佢領軍護級，絕對係苛求。干羅上任後踢咗5場，錄得1和4負劣績，其中鬥富咸同曼聯都吞5蛋，主場又輸畀護級對手布力般，表現曳過麥卡菲揸旗時代。因此今晚主場鬥保頓根本讓唔起平半。保頓打到季尾有起色，上兩仗聯賽全取6分，作客應該有分落袋。


（有線203及303台周六晚10時直播）