澳職季後賽今日開打！

猪拉多纳

30/03/2012

A-League季後賽今日勁爆開打，常規賽冠軍中岸水手同亞軍布里斯班獅吼，分別要打破宿命同創造歷史。水手過去3次殺入季後賽總決賽，始終未竟全功；獅吼就要爭取成為史上首支成功衞冕總冠軍球隊。加上珀斯光輝、威靈頓鳳凰、FC悉尼同墨爾本雄心同樣爭攞「A」，戰況肯定夠激。

常規賽1哥防守最勁 中岸水手誓圓錦標夢

曾於06年、08年同11年先後躋身季後賽總決賽飲恨嘅中岸水手，今季能夠喺常規賽封王，最主要係防線夠硬淨，聯賽踢27場僅失24球，防線密到幾乎針都插唔入，成為澳職防守力最強球隊。


現年19歲嘅中岸門神馬菲賴恩，前季已經上位當選澳職最佳年輕球員，現時佢係澳洲奧運隊主力，並被視為國家隊未來希望，把關功夫受到各方激讚。雖然馬菲賴恩今季曾因傷休息，被迫錯過唔少比賽，不過中岸今季平均每場聯賽只係失0.89球，佢依然有好大功勞，破唔破到宿命捧盃，就要靠佢同另一位澳洲新星保沙歷嘅發揮。


防守王排名


1.中岸水手失24球


2.布里斯班獅吼失28球

3.威靈頓鳳凰失32球

光輝勁開「讓球勝」

珀斯光輝向來作客無力，但經過今季瘋狂擴軍後，作客表現明顯有好轉，至少唔會再任人肉魚，最終常規賽作客有5勝3和6負，演出有晒交代。呢隊波主場表現對辦，錄得8勝1和4負佳績，所以無論讓波定受讓都好容易有斬獲，結果今季聯賽27戰有14次開出「讓球勝」收錢，比率達到52%，追捧價值相當高。至於「讓球和」同「讓球負」，就分別有6場同7場。

讓球主客和勝出排名

1.珀斯光輝14場 / 52%

1.墨爾本雄心14場 / 52%

3.威靈頓鳳凰13場 / 48%

FC悉尼做慣「大」騷

FC悉尼喺今季常規賽表現唔出冠軍相，聯賽27場入37球前線火力普通，但由於佢哋防線唔穩陣，失球數字達42球，所以好容易同對手做「大」騷。

今季悉尼喺常規賽有16次開入球大，相反開入球細得11場，最終與入唔到季後賽嘅墨爾本勝利，成為常規賽開入球大次數最多嘅球隊，比率達59%，覺得玩入球大比較刺激簡單嘅球迷，一定要緊貼悉尼嘅比賽至得。

開大王排名

1.FC悉尼16場 / 59%

1.墨爾本勝利16場 / 59%

3.珀斯光輝15場 / 56%

貝利沙爆發榮登入球王 獅吼挑戰衞冕魔咒

上季成為常規賽同總決賽雙料冠軍嘅布里斯班獅吼，今季保持強大火力，聯賽27戰入50球，有能力攻陷任何澳職對手大門。入球數目比常規賽冠軍中岸水手多出10球，單計入球能力絕對係澳職最強。

今季獅吼火力咁勁，最主要係阿爾巴尼亞國腳貝利沙大爆發，攻入19球成為常規賽神射手。以往貝利沙効力漢堡同比勒費爾德出場機會有限，根本冇咩人留意到佢，但去到澳職就完全係佢世界，瘋狂入波下造就獅吼平均每場聯賽攻入1.85球，只要佢繼續有波入，就有機會帶挈獅吼捧盃歷史性冧莊。

入球王排名

1.布里斯班獅吼50球

2.中岸水手40球

2.珀斯光輝40球

威靈頓鳳凰細盤之王

威靈頓鳳凰入球能力可以話係有限公司，今季常規賽27戰入34球，屬於季後賽6強中火力最差球隊。

正因為咁，鳳凰今季常規賽得10場開入球大，反而有17場開入球細，唔傾向同對手搶攻或者開入球騷，開入球細比率高達63%，佢哋唔會要求盡數對手，而且唔介意歎慢板鬥耐性，踢守勢波先係佢哋強項，吼實鳳凰入球細有着數。

開細王排名

1.威靈頓鳳凰17場 / 63%

2.中岸水手16場 / 59%

3.阿德萊德聯15場 / 56%

撐雄心讓球7成唔使輸

墨爾本雄心今季以2分之微壓倒紐卡素噴射機，搭上季後賽尾班車，過程的確令球迷嚇到冷汗都出埋。但如果單計投X角度，雄心擁躉就應該笑晒口，今季佢哋聯賽有17次足智彩開「讓球」，結果佢哋有9次成功收錢，另外有3次走盤，只得5次損手而回。由於雄心「讓球」9次贏盤，比率達53%，兼有71%機會唔使輸，比起中岸水手得60%坐走望贏更抵捧。

讓球勝出排名

1.墨爾本雄心9場

1.紐卡素噴射機9場

1.中岸水手9場