法蘭克福博升搶劫波琴

猪拉多纳

30/03/2012
文： ComboKing

德乙進入大直路，大家要特別留意爭升班及護級球隊，佢哋勝在目標鮮明、鬥志旺盛，「二哥」法蘭克福今晚主場對波琴。法軍今季跌落乙組，矢志重返德甲，表現相當對辦，來到臨門一腳梗係搏埋佢，反觀波琴踢緊風流波，唔會破壞法蘭克福大事，阿King捧「讓球主勝」。（周六凌晨零時開賽）


法蘭克福喺德乙表現超班，一直位居前列，來到季尾更加踩油全力衝刺，已連贏四場，近三仗起碼淨贏對手三球或以上，可謂愈戰愈勇。根據賽制，如果同分就要計得失球區分排名，所以入多幾球對爭升班有利，預料法蘭克福餘下賽事不僅想贏，仲會盡數對手。


波琴喺中游浮沉，近期更有放軟手腳趨勢，近五場聯賽只得一和四負，包括作客以二比六慘敗喺另一支爭升班分子格雷特霍夫腳下，今次遇上法蘭克福，隨時唔止輸兩球。

亞琛追殺特雷斯登

護級方面，尾三嘅亞琛主場對特雷斯登，亞琛接連敗陣，再唔發力好可能下季丙組見，好彩今次對手特雷斯登開始走下坡，亞琛有望趁機攞到三分。另外，布倫瑞克主場對柏達邦，兩隊近期都表現麻麻，考慮到主隊近七場六場開細，再追入球細。