多蒙特衝刺加鞭

猪拉多纳

30/03/2012
文： 蘇斯黑柴

德甲獨腳戲多蒙特主場迎戰史特加，榜首多蒙特正為衞冕全力衝刺，目前正受到質高態勇嘅班霸拜仁力追，現階段一分都不能少，面對實力次一皮加上防線欠穩嘅史特加過關冇難度，黑柴捧1.65倍「讓球主勝」。（有線64及204台周六凌晨2時30分直播）


多蒙特目前只領先拜仁5分，不過拜仁追勢如狼似虎，年輕嘅多蒙特絕對唔敢掉以輕心，佢哋力圖喺下月十二日迎戰拜仁之前保住優勢，球隊近11場聯賽10勝1和，雖然較早前前線曾出現啞火，不過上仗作客科隆喺先失守下連入6球反勝，信心返晒嚟，由於歐戰已出局，德國盃亦已順利殺入決賽，可以專注聯賽搏殺。

史特加遇強即瓜

多蒙特重拾佳態，日本中場香川真司已成為球隊真正領袖，今季聯賽已取得11個入球同9次助攻，上仗大炒科隆更主宰大部分入球同攻勢，香川真司踏入今年愈戰愈勇，近8場聯賽已入7球，今晚繼續領軍坐鎮西法倫主場當然有把握，何況上仗大勝後，多蒙特喺得失球差方面只落後拜仁6球，考慮到日後隨時鬥到最後一刻，今仗遇上孱弱防線對手會搶得就搶，爭取另一場大勝。


史特加近6次對多蒙特只輸一場，而且近7場聯賽亦取得5勝1和1負佳績，不過所贏嘅都係弱旅，唯一敗仗就係輸畀排名相近嘅漢諾威，上仗打吡戰主場對住弱旅紐倫堡都大部分時間捱打，贏得有運。雖然射手伊比斯域復出，上仗對紐倫堡嘅入球功臣卡卡奧累積5面黃牌要停賽，今晚遇上質、態同戰意都一流嘅多蒙特，難逃被炒厄運。