史浩克啃唔落牛角「包」

猪拉多纳

29/03/2012
文： 力奇

「鬥牛殺手」西甲畢爾包喺歐霸盃16強淘汰曼聯後，竟陷入低潮，佢哋今晚喺8強首回合作客德甲史浩克04，後者4連勝狀態大勇，牌面睇畢爾包難免落入下風，但偏偏個盤只係主隊小讓平半，擺明有蠱惑。史浩克近日有射手亨特拉爾續約成疑影響軍心，對住呢件鬥牛國牛角「包」隨時骾親，力奇今仗一於博1.98倍下盤。（有線61及201周五凌晨3：05直播）

亨特拉爾或離隊損士氣

能夠接連主客兩回合擊敗曼聯，畢爾包實力當然唔簡單，只不過同時喺西甲爭逐下屆歐洲賽席位嘅佢哋，近4場聯賽表現就大幅走樣，只得1和3負恐怖戰績，狀態的確令人擔心。相比起嚟，上一圈擊敗川迪嘅史浩克，連埋次回合贏波一役，近4戰就錄得全勝佳績，勁入13球僅失3球，近況正好同畢爾包相反。


事實上，貴為96/97年歐協盃冠軍嘅史浩克04，今仗更有地利，被秤高一線其實相當合理，特別係佢哋個進攻鐵三角亨特拉爾、魯爾同法芬持續表現高水準。但問題係，今季已經射入咗40球嘅亨特拉爾，早排傾新約就出現阻滯，會喺下季約滿嘅佢盛傳今夏隨時離隊，呢個消息對班波肯定係一大打擊，士氣亦會受損。

畢爾包強陣出擊

畢爾包呢邊，自1977年後再入8強，鬥志毋須懷疑。佢哋目前西甲爭歐洲賽席位形勢一般，最直接自然係爭冠軍博下屆可參賽衞冕。球隊目前傷兵只得中場大衞盧比斯，其餘包括左腳有傷嘅首席射手洛蘭迪，亦趕及傷愈披甲。強陣出擊，畢爾包只要踢番應有水準，連曼聯都砌得低，唔通會驚史浩克咩？莊家開盤有顧忌，上盤讓唔多，個下盤反而更加有得諗。

橫數千軍

 史浩克歐戰易失波


‧歷來主場10鬥西班牙球隊得5勝2和3負。

‧今屆歐戰主場6戰得5勝1和，惟得1仗冇失波。

 畢爾包作客士哥多

‧歷來6鬥德甲球隊取得1勝1和4負。

‧今屆歐戰客場5戰3勝，場場有波入。

賽制：採主客兩回合淘汰制，今輪為8強首回合，若總比數相同，作客入球較多一隊晉級，再和則於次回合後加時作賽。若加時入球數字相同，客隊將憑作客入球優惠晉級，若加時沒有入球，則需互射12碼決勝。