阿爾克馬爾平手補個和

猪拉多纳

29/03/2012
文： 笛子波童

歐霸盃八強首回合，荷甲阿爾克馬爾（AZ）主場鬥西甲華倫西亞，AZ今季二十四場主場賽事未輸過，唔使讓波已經非常抵玩，再加上華倫近期狀態轉弱，平手盤捧主隊坐和望贏。（有線64及204台周五凌晨3時05分直播）


AZ係今季歐洲主場成績最好球隊之一，總計國內聯賽、盃賽及歐洲賽一共踢咗二十四場比賽，只在上周中荷蘭盃四強加時輸畀荷華高斯，換句話講佢哋主場喺法定時間內依然保持不敗。如果單計歐洲賽，佢哋近三季十五場取得九勝五和一負，不敗率超過九成，就憑以上數據，平手盤實在有極高捧場價值。

華倫作客曳近況差

仲有一點值得留意，AZ今季主場兩場贏唔到嘅歐霸盃賽事，均在落後情況下後上逼和對手，上圈次回合作客烏甸尼斯亦在落後兩球兼少打一人劣勢下，憑中場法堅貝治射入一個關鍵作客入球淘汰對手，可見呢班波韌力十足，要贏佢哋絕對唔易。


華倫連續兩圈遇上荷甲球隊，上圈淘汰燕豪芬全賴首回合贏波打下良好基礎，作客一役根本冇優勢可言。由歐聯分組賽開始，華倫今季五場作客歐洲賽只贏過一次，而且佢哋對上兩場聯賽先後不敵薩拉戈薩及基達菲，狀態、信心均有不穩迹象，作客不宜抱太大期望。