德西決大混戰 史浩克獵人包搞掂

猪拉多纳

29/03/2012
文： 蘇斯黑柴

歐霸盃八強首回合上演「德西決」！繼08年歐國盃決賽及10年世界盃四強後，「德國坦克」大戰「西國狂牛」嘅戰場轉移到歐霸盃，德甲代表史浩克04及漢諾威抽籤遇上西甲畢爾包及馬德里體育會，新仇舊恨共冶一爐，預計將踢到飛沙劈石，一於齊齊捧大盤！


德甲史浩克04主場迎擊畢爾包係八強矚目戲碼，史浩克近期無堅不摧，加上擁有弗爆嘅亨特拉爾喺前線數胡，主場可望攻陷近況下滑嘅畢爾包，雙選入球大同上盤。


（有線61及201台周五凌晨3時05分直播）

畢爾包「大」跌Watt

史浩克近四戰全勝，每仗最少淨勝兩球或以上，上周末聯賽主場兩球輕取勁敵利華古遜，睇過程簡直一面倒。前線「獵人」亨特拉爾着晒火，近四場轟入七球，喺德甲入廿二球，在歐霸盃亦入九球領先射手榜，今季各項賽事入球達到四十個，有佢在陣絕對係入球保證。


畢爾包上圈主客兩回合雙殺曼聯，主攻風格令人讚不絕口，不過畢爾包兵源同經驗始終有限，球隊近期明顯有疲態，近四場聯賽只得一分，加上該隊過去歐戰作客德國三戰全敗，面對當起嘅史浩克好難全身而退。


史浩克防線大將賀維迪斯繼續因傷缺陣，近四場歐霸盃賽事都有失波，至於畢爾包近六場正式賽事都有失球，平均每場失1.8球，今仗兩軍都攻優於守，除史浩克上盤外，入球大亦值得捧場。