漢堡發霉送入「狼」口

猪拉多纳

23/03/2012
文： 查理阿蛋

自從「港人之子」林志堅連後備都冇得做，留意漢堡嘅球迷都少咗好多，其實佢哋近排愈踢愈頹已經陷入降班邊緣，仲要作客主場惡到爆嘅「狼堡」禾夫斯堡，呢個「發霉漢堡」又點撐得落？1.88倍主勝就夠穩陣喇！（有線64、204周六凌晨3:30直播）

5戰得1分球迷噓爆

漢堡喺過去5場聯賽只係斬獲1分咁大把，已經跌入護級漩渦，上場喺主場輸畀弗賴堡之後，連自己班球迷都報以噓聲，就知表現有幾唔掂！唯一冇被「開汽水」嘅查洛林都怒插隊友完全冇心踢，士氣極度低落。


最麻煩嘅係王牌射手荷西古里路，早前喺比賽中暴力侵犯史特加門將烏里治要坐8場波監，依家更面臨被起訴，港人最關心嘅林志堅又一早冇咗影，上季聯賽第8嘅球隊居然搞成咁，又可以搵邊個打救？

禾夫斯堡主場硬淨

漢堡今季有20個失球嚟自對手嘅死球攻勢，為咗改善情況，教頭芬克真係無所不用其極，佢居然話隊波再因為死球失波就要罰錢，入到波就會有錢分！小妹唔敢講班球員會唔會為咗筆錢而踢得特別醒神，但係禾夫斯堡近8場主場聯賽只係輸過1場，即使對住慕遜加柏都立於不敗之地，上場仲贏埋利華古遜，證明佢哋喺自己地頭絕對惡得起，漢堡想打翻身戰真係極有難度。