幸運薛達乘勇踩多腳

猪拉多纳

23/03/2012

今日阿King主要研究幾場荷乙，幸運薛達作客安曼，幸運薛達踏入二月氣勢如虹，近期頻頻贏波，安曼五連敗兼一球不入，已經輸到慌，今次無力搶分，捧客勝！（周六凌晨３時開賽）


幸運薛達今季聯賽作客戰績好曳，踢到依家十三場只贏兩次，勝出率極低，本來作客被熱捧，睇落唔多開胃。不過呢班波踏入二月愈戰愈勇，對上七場賽事五勝兩和，當中包括兩次作客贏波，表現相當對辦。幸運薛達一眾主將賀爾臣、舒利奧斯同雷蒙禾恩狀態大勇，近期頻頻士哥，續成球隊搶分重要人物。


安曼目前位列聯賽榜尾，但有一點要注意，今季荷乙取消降班制度，換言之安曼就算衰到貼地都可保住乙組席位，嚴重影響球員作戰態度。事實上，安曼近期真係踢得好曳，近五場聯賽全敗，先後畀馬斯特里赫特同威廉二世狂數，而且仲要顆粒無收，無論防守同進攻都好曳，今次對住幸運薛達好難頂得住。

施禾利炒起阿高夫

同日施禾利主場對阿高夫，兩隊實力懸殊，阿高夫近期失球數字高企，對上四場勁失十一球，加上近三次對施禾利都被大炒，今場大細中位數調升至3.5球，照捧大盤！另外，威廉二世主場對多德勒支，威廉二世近三次主場出擊轟入十一球，火力超強，再追大盤！