德盃4強拜仁遇剋星遜唔過

猪拉多纳

21/03/2012
文： 安高

拜仁慕尼黑今晚喺德國盃4強作客慕遜加柏，咪以為狀態弗爆就可以為所欲為，事關慕遜今時唔同往日，最重要係佢哋近年變身拜仁剋星，對賽贏多輸少，今仗拜仁仲要冇發電機舒韋恩史迪加，邊讓得起對手半一？安高捧1.96倍「下盤」。（無綫翡翠台周四凌晨3:30直播）


慕遜近5次主場對賽不敗


近3場全勝兼轟入20球嘅拜仁，無疑係近期歐洲球壇最弗球隊，射手馬里奧高美斯、快翼列貝利同洛賓嘅組合威力的確唔講得笑。不過，佢哋目前仲有機會做歐聯、德甲同德國盃三冠王，分心三路戰線，無疑會令佢哋負擔加劇，如果要放棄一樣，唔使問，係人都會揀最次要嘅德國盃，淨係呢點已經捧唔落拜仁啦！


另邊廂嘅慕遜，上季僥倖護級成功，今季無啦啦有新星馬高列奧斯同靴爾文大爆發，家陣殺到上聯賽榜第3位，只係較拜仁少3分，實力並唔簡單。呢班波今季喺各路戰線主場14戰不敗，聯賽仲要雙殺拜仁，近5次主場對賽同樣未輸過，考慮埋佢哋件中場重心靴爾文傷愈復出，強陣出擊，要保住不敗開下盤，應該唔難。