阿仙奴嗒糖 實食冇黐牙

猪拉多纳

21/03/2012
文： 亨格比利

今晚英超激戰連場，其中愛華頓就會喺主場硬撼阿仙奴。拖肥糖今季專劏強隊，不過嚟到季尾鬥心等同一切，兵工廠為保前4席位，對住近期忙到甩轆嘅愛華頓可以秤先，阿仙奴讓平半，亨格比利撐上盤。（有線201及301周四凌晨4:00直播）


阿仙奴近排贏到開巷，尹佩斯Keep住On Fire固然係主因，另一功臣就肯定係31歲、突然返老還童嘅路斯基，呢位捷克老將近期獲委任做番派牌工作，表現重拾昔日効力多蒙特時候嘅風采。賽前阿仙奴收到好消息，左閘安德里山度士已經傷愈可候命，即係雲格又多一位猛將可以調動。

愛華頓兵源不足攰到爆

歐聯Game Over，足總盃又出埋局，阿仙奴家陣可以疊埋心水爭前四，戰意唔需要懷疑；相反愛華頓喺聯賽高不成低不就，難得足總盃入到8強當然要搏埋佢，拖肥糖上周末先同新特蘭砌完，嚟緊撼完阿仙奴同史雲斯之後又要同「黑貓」進行補賽，球員攰爆唔在講，領隊莫耶斯都話淨係諗留力同輪換都搞到一頭煙。


冇錯，愛華頓今季係專劏勁旅，強如曼城、車路士同熱刺去到葛迪遜公園都要擺低3分，之但係佢哋近期就先後失分畀韋根、昆士柏同輸鑊勁嘅畀利物浦，表現明顯跌Watt。呢隊波最濕滯嘅係鋒力薄弱，迄今只係入得28球，新兵謝拉域係等餵波型射手，踢法似乎唔多啱愛華頓，亦係佢加盟至今只係入得1球嘅主因，對住愈戰愈勇兼鬥心爆棚嘅阿仙奴，唔似有運行。

橫數千軍

愛華頓畀廠仔恰慣


‧對上9次聯賽鬥阿仙奴錄得2和7負。

‧卡希爾近4次喺葛迪遜對阿仙奴有3場有波入。

阿仙奴旺入球大

‧最近8場比賽有7場開入球大。

‧近2場英超作客勝仗都係先落後。