曼城鍊車 大舉進攻

猪拉多纳

21/03/2012
文： 朱楓

今晚英超上演4場大戰，當中最矚目梗係曼城主場火併車路士。「藍月亮」為咗爭冠軍，今場非勝不可，有傳仲可能搵「野獸」泰維斯復出做雷霆救兵；不過車路士亦要為爭入前4踢下屆歐聯資格搏命，同樣唔衰得，適逢費托近日鹹魚翻生，兩大高手過招，似乎1.8倍入球大最抵玩！（有線200及300、廣東體育周四凌晨3:45直播）

泰維斯解凍做後備

曼城近排表現急跌，喺英超已被榜首曼聯拋離4分，為爭冠軍，呢場可以話不容有失。「藍月亮」近排大跌Watt，朱楓覺得最大原因同尼史葛同高柏尼受傷有關，不過據曼徹斯特啲傳媒尋晚報道，文仙尼為爭標，今仗好可能冒險搵番兩人復出鎮守後防，減低失球數字。


至於前線方面，據報曼城今晚會打4231陣式，搵拿斯尼、阿古路同大衞施華支援單箭頭迪斯高，不過最令球迷期待，係文仙尼賽前暗示被雪藏多時嘅泰維斯，今晚好大機會獲解凍擔任後備，中場尼祖迪莊近日就透露，曼城一眾球員都好歡迎「野獸」回歸，覺得佢會成為球隊爭標嘅關鍵人物，中堅尼史葛更加話泰維斯回歸，直頭好似隊波新簽球員一樣，大大增強進攻能力。

車仔踩油4連勝

不過朱楓對於曼城今場個單W始終冇十足把握，事關對家車路士自從由迪馬堤奧接手後，成隊波脫胎換骨取得4連勝，就連頹廢多時費蘭度托利斯，日前喺足總盃對李斯特城都打破入球荒，信心返晒嚟，加埋杜奧巴、林柏特同艾殊利高爾等主力休息1場後今晚都可復出，真係有本錢同曼城鬥攻o架！


賽果熱線：2707 9900　周三晚6時50分起至周四晚6時止

橫數千軍

曼城近戰旺開單

‧近8場6勝2負，有6場開單。

‧聯賽主場14戰全勝，勝率達100%。

車仔近2仗勁入8球

‧近6次作客曼城得4勝2負。

‧近8場5勝1和2負，對上2仗勁入8球。